Latviya Ichki ishlar vazirligi jinoyatchilik ko‘paygani sababli O‘zbekiston fuqarolariga viza berishni to‘xtatishni taklif qildi
Vazirlik e’lon qilgan rasmiy axborotda bu qadamga ayrim O‘zbekiston fuqarolari mamlakatga kirib kelgach, shu jumladan voyaga yetmaganlarga qarshi og‘ir jinoyatlarni sodir etgani sabab qilib ko‘rsatilgan.
Ichki ishlar vaziri Yanis Dombrava viza cheklovlari amal qiladigan davrda O‘zbekiston vakolatli idoralari bilan hamkorlikni kuchaytirish hamda chegaradan kirib kelayotgan shaxslarni tekshirish mexanizmlarini takomillashtirish zarurligini ta’kidladi. Ushbu tashabbus amaldagi Immigratsiya to‘g‘risidagi qonunning tegishli moddalariga tayangan holda ilgari surilgan.
Biroq hukumat koalitsiyasi hamkorlari mazkur masalani darhol kun tartibiga kiritishga tayyor bo‘lmagani sababli taklif keyingi yig‘ilishda ko‘rib chiqilishi kutilmoqda. Hozircha O‘zbekiston fuqarolariga viza berishni to‘liq to‘xtatish bo‘yicha yakuniy qaror qabul qilinmagan, shuningdek, ehtimoliy cheklovlarning muddatlari va istisno holatlari ochiqlanmagan.
