Kredit reklamalarida xatarlar haqida ogohlantirish berish majburiy qilindi, qoidani buzgan banklar faoliyati cheklanadi
Adliya vazirligida 3948-son bilan ro‘yxatdan o‘tkazilgan ushbu yangi hujjat rasmiy e’lon qilinganidan bir oy o‘tib kuchga kiradi.
Yangi talablarga muvofiq, banklar har qanday formatdagi kredit reklamalarida majburiyatlar bajarilmasligining oqibatlari haqida maxsus ogohlantirish berishi shart qilib qo‘yildi. Bosma va elektron reklamalarda ushbu ma’lumot umumiy maydonning kamida 10 foizini egallashi, audio hamda videoroliklarda esa umumiy vaqtning kamida 10 foizi ushbu ogohlantirishga ajratilishi lozim.
Shuningdek, kredit shartnomalarining birinchi sahifasida, matn boshlanishidan ilgari sahifa yuzasining kamida 30 foizini egallaydigan maxsus ogohlantiruvchi axborot bloki joylashtirilishi shart.
Agarda banklar fuqarolarni chalg‘ituvchi kredit mahsulotlarini taklif qilsa, Markaziy bank ularga nisbatan ayrim operatsiyalarni bajarish yoki infratuzilmani kengaytirishni olti oygacha taqiqlash huquqiga ega bo‘ldi.
