Kivanch Tatlitug‘ning uyida ishlagan turkmanistonlik ishchi tomdan yiqilib, reanimatsiyaga yotqizildi
Turkiyaning Istanbul shahrida 31-avgust kuni Kivanch Tatlitug‘ning uyida tozalash ishlarini bajarayotgan Turkmaniston fuqarosi Bahadur Yangibayev tomdan yiqilishi oqibatida og‘ir jarohatlanib, reanimatsiyaga yotqizildi. Bu haqda Cumhuriyet xabar berdi.
Tozalash firmasi egasi o‘z ko‘rsatmasida: “Bu shaxs mening xodimim emas, unga tomga chiqishni ham aytmaganman”, degan. Shuningdek, u ishchini tomga Kivanch Tatlitug‘ chiqarganini da’vo qilgan.
Firma egasi Kivanch Tatlitug‘ ustidan prokuraturaga ariza bergan. Aktyorning advokati esa Tatlitug‘ oilasi tomdan yiqilgan ishchining kelishiga rozilik bermaganini va uni tanimaganini bildirgan.
Advokatning ta’kidlashicha, hodisaning ilk kunidan boshlab jabrlanuvchining oilasi bilan bog‘lanilgan hamda uning davolanish jarayoni va xarajatlari bilan yaqindan shug‘ullanilgan.
Kivanch Tatlitug‘ ham firma egasi ustidan shikoyat qilishi bildirilgan. Tomdan yiqilgan ishchining reanimatsiyadagi davolanishi davom etmoqda.
