Kichik biznesni tekshirishga 3 yillik moratoriy e’lon qilindi hamda “Ikkinchi imkon” iqtisodiy amnistiyasi joriy etildi
Prezidentning tadbirkorlar bilan VI ochiq muloqotida belgilangan vazifalar ijrosini ta’minlashga qaratilgan farmon bilan kichik biznes subyektlari faoliyatini har qanday tekshirishga 3 yillik taqiq qo‘yildi. Ushbu cheklov jinoyat ishlari, inson salomatligi, mehnat qonunchiligi, fuqarolar murojaatlari, QQSni qaytarish va korxonani tugatish bilan bog‘liq maxsus holatlarga tatbiq etilmaydi. Moratoriy davrida noqonuniy tekshiruv o‘tkazgan mansabdor shaxslar qat’iy javobgarlikka tortiladi.
Hujjat bilan tadbirkorlar uchun qator yengilliklar va iqtisodiy amnistiya ko‘zda tutilgan. 2027-yil 1-yanvardan birinchi marta qoida buzgan tadbirkorga darhol jarima solinmay, kamchilikni bartaraf etish uchun 10 kun muddat beriladi. “Ikkinchi imkon” amnistiyasi doirasida esa 2026-yil 31-dekabrga qadar asosiy soliq qarzini to‘liq yopgan subyektlarning penyalari va soliq hisobotini kechiktirganlik uchun qo‘llanilgan to‘lanmagan ma’muriy jarimalari bekor qilinadi.
Shuningdek, davlat organlari va tadbirkorlar o‘rtasidagi munosabatlarda “tadbirkorlik subyektining haqliligi prezumpsiyasi” amaliyotga kirmoqda. Endilikda tadbirkorning aybini isbotlash majburiyati to‘liq davlat organi zimmasiga tushadi, qonunchilikdagi har qanday noaniqliklar esa tadbirkor foydasiga talqin etiladi. Farmonda turizm sohasi ham qo‘llab-quvvatlanib, mehmonxonalar qurilishi va yer-mulk solig‘i bo‘yicha imtiyozlar muddati uzaytirildi.
