Kelinini o‘z joniga qasd qilish darajasiga yetkazgan qaynona 5 yilga qamaldi
Qashqadaryo viloyati Chiroqchi tumanida yashovchi, 1977-yilda tug‘ilgan 49 yoshli ayol keliniga nisbatan uzoq yillar davomida jismoniy va ruhiy zo‘ravonlik qilgani uchun sudlandi. Bu haqda Portal24.uz jurnalisti sud hujjati bilan tanishdi.
Ma’lum qilindiki, qaynona 2022-yil yanvaridan 2025-yil 2-oktyabriga qadar kelinini muntazam haqorat qilib, bir necha bor kaltaklagan hamda ruhiy bosim o‘tkazgan. U kelinini uy yumushlarini bajara olmaslikda ayblab, yuziga va tanasining turli joylariga urgan, ayrim holatlarda sochidan tortib ko‘chaga sudrab chiqargan va uydan haydab yuborgan.
Shuningdek, kelinning ota-onasi bilan uchrashishini cheklagan, telefonidan foydalanishiga to‘sqinlik qilgan hamda uni muntazam ravishda xo‘rlab kelgan.
Sud hujjatlariga ko‘ra, doimiy jismoniy va ruhiy bosimlarga chiday olmagan kelin 2025-yil 2-oktyabr kuni yashash uyidagi molxona shiftiga o‘zini osib, o‘z joniga qasd qilgan. Sud-tibbiy ekspertizasi o‘lim osilish oqibatida yuzaga kelgan mexanik asfiksiya sabab sodir bo‘lganini, marhumaning tanasida esa o‘limidan avval yetkazilgan tan jarohatlari mavjud bo‘lganini aniqlagan.
Jinoyat ishi Chiroqchi tuman sudida ko‘rib chiqildi. 2026-yil 27-aprel kuni sud ayolni O‘zbekiston Respublikasi Jinoyat kodeksining 103-moddasi 2-qismi “a” bandi bilan aybdor deb topdi. Jinoyat kodeksining 57-moddasi qo‘llanilib, unga 5 yil muddatga ozodlikdan mahrum qilish jazosi tayinlandi. Jazoni umumiy tartibli koloniyada o‘tashi belgilandi va sudlanuvchi hukm e'lon qilingan zahoti sud zalida qamoqqa olindi.
