Kaspiy dengizidagi mashg‘ulotlarda 14 nafar harbiy halok bo‘lganidan so‘ng Qozog‘iston mudofaa vaziri lavozimidan olib tashlandi
Kosanov 2025-yil iyunidan buyon Mudofaa vazirligiga rahbarlik qilib kelayotgan va joriy yil sentyabr oyi boshida ushbu lavozimga qayta tayinlangan edi. Uning iste’fosi Kaspiy dengizida o‘tkazilgan “Xazar qorgany – 2026” harbiy-dengiz mashg‘ulotlari vaqtida 14 nafar harbiy xizmatchining fojiali halok bo‘lishi ortidan yuz berdi.
24-sentyabr kuni Mang‘istau viloyatida kechgan mashg‘ulotlarda harbiylarni katerdan tushirish jarayonida ob-havo keskin yomonlashishi hamda kuchli shamol tufayli bir guruh harbiylarni dengiz oqimi olib ketgan. Qidiruv-qutqaruv amaliyoti davomida atigi 3 kishi qutqarib qolingan, 14 nafar askar va mas’ulning jasadlari suvdan olib chiqilgan.
Fojia ortidan ehtiyotsizlik hamda kema boshqaruvi qoidalarini buzish moddalari bo‘yicha jinoyat ishi qo‘zg‘atilib, Mudofaa vazirligining 5 nafar yuqori martabali harbiysi va komandirlari qamoqqa olindi. Ular orasida Harbiy-dengiz kuchlari bosh qo‘mondoni birinchi o‘rinbosari hamda harbiy qism komandirlari bor.
Mazkur voqea munosabati bilan Qozog‘istonda umummilliy motam e’lon qilindi hamda Mudofaa vazirligidagi umumiy faoliyatni va xavfsizlik choralarini kompleks tekshirish uchun maxsus davlat komissiyasi tuzildi.
