Jizzaxda 2-sinf o‘quvchisini mashina urib ketishidan saqlab qolgan o‘quvchiga to‘n kiydirilib, taqdirlandi
Jizzax viloyatining Forish tumanida yo‘lni kesib o‘tayotgan 2-sinf o‘quvchisini Gentra urib ketishidan saqlab qolgan katta sinf o‘quvchisi taqdirlandi.
Hodisa 10-sentyabr kuni sodir bo‘lgan. Kuzatuv kamerasiga tushgan lavhalarda 2-sinf o‘quvchisi maktab tomon yugurib, yo‘lni kesib o‘tayotganini ko‘rish mumkin. Shu payt yo‘lda harakatlanib kelayotgan Gentra bolaga juda yaqinlashib qolgan.
Vaziyatni payqagan katta sinf o‘quvchisi tezkorlik bilan harakat qilib, kichik yoshdagi bolani yo‘ldan tortib olgan. Shu tariqa u o‘quvchini avtomobil urib ketishidan saqlab qolgan.
Voqeadan bir kun o‘tib, 11-sentyabr kuni jasorat ko‘rsatgan o‘quvchini taqdirlash marosimi tashkil etildi. Unda hayoti saqlab qolingan 2-sinf o‘quvchisining onasi unga minnatdorlik ramzi sifatida to‘n kiydirdi.
Shuningdek, o‘quvchining hushyorligi va tezkor harakati e’tirof etilib, Yo‘l harakati xavfsizligi boshqarmasi hamda boshqa tashkilotlar tomonidan unga televizor, aqlli telefon, kitoblar to‘plami va boshqa sovg‘alar topshirildi.
