Islom sivilizatsiyasi markazida IIO xodimlariga qarshilik qilgan rolikchilar jazolandi
Poytaxt IIBB ma’lum qiladiki, soat 21:00 larda gavjum hududda rolik uchayotgan yoshlarga profilaktika xodimlari e’tiroz bildirib, bu yer extreme sport uchun mo‘ljallanmaganini tushuntirgan. Biroq yoshlar ogohlantirishga bo‘ysunmasdan, xodimlarga faol qarshilik ko‘rsatgan va mojaro tasvirlangan video ijtimoiy tarmoqlarda tarqalib, e’tirozlarga sabab bo‘lgan.
Sud xulosasiga ko‘ra, barcha huquqbuzarlar Ma’muriy javobgarlik to‘g‘risidagi kodeksning 183-moddasi (mayda bezorilik) va 194-moddasi (IIO xodimining qonuniy talabini bajarmaslik) bo‘yicha aybli deb topildi. Qilmishidan pushaymonligini bildirib, xalqdan uzr so‘ragan yoshlardan ikki nafari jarimaga tortildi, asosiy qarshilik ko‘rsatgan fuqaro esa 10 sutkaga qamaldi.
Mutaxassislar va hudud aholisining ta’kidlashicha, ushbu ma’naviy-ma’rifiy maskanga har kuni minglab mahalliy va xorijiy sayyohlar, keksa yoshdagilar hamda homilador ayollar tashrif buyuradi. Belgilanmagan hududda rolik, skeyt hamda samokatda tez harakatlanish fuqarolar xavfsizligiga xavf tug‘dirishi sababli bunday sport turlari bilan faqat ajratilgan maxsus maydonchalarda shug‘ullanish so‘ralmoqda.
