Internetda “xayp” qilib, mushtlashgan bloger va MMA jangchisi ushlanib, xalqdan uzr so‘radi
Joriy yilning 19-avgust kuni tunda Chirchiq shahrining qatnov qismida 25 va 27 yoshli ikki yigit o‘rtasida mushtlashuv sodir bo‘lgan. Janjal ishtirokchilarining biri taniqli bloger, ikkinchisi esa aralash yakkakurash (MMA) sportchisi va blogerlik bilan shug‘ullanuvchi shaxs bo‘lib chiqqan. Hodisa aks etgan kadrlar tarmoqda tez tarqalib, ko‘plab kuzatuvchilarda bu xabar ortidan qamrov yig‘ishga qaratilgan oldindan rejalashtirilgan sahna ko‘rinishi bo‘lishi mumkin degan shubhalarni uyg‘otgan.
Tekshiruvlar davomida aniqlanishicha, yigitlar o‘rtasidagi mojaro virtual makondagi o‘zaro haqoratlar va salbiy izohlardan boshlangan. Ular muammoni yuzma-yuz hal qilish uchun uchrashishgan, biroq suhbat tezda ayovsiz mushtlashuvga aylanib ketgan. Voqeadan so‘ng Chirchiq shahar IIB xodimlari vaziyatga tezkorlik bilan aralashib, nizolashgan yigitlarning ikkalasini ham joyida ushlab, idoraga olib ketgan.
Toshkent viloyati IIBB e’lon qilgan rasmiy suhbat videosida MMA jangchisi o‘z sahifasidagi obunachilar faolligini hamda ko‘rishlar sonini (qamrovni) sun’iy ravishda oshirish uchun doimiy ravishda mana shunday mojaroli mazmundagi post va videolardan foydalanib kelganini ochiq tan oldi. Ikkinchi taraf bo‘lmish bloger esa har qanday zo‘ravonlikka qarshi ekanini bildirgan.
Qilmishidan pushaymon bo‘lgan blogerlar O‘zbekiston xalqidan uzr so‘rab, yoshlarni ko‘chalarda janjallashmaslikka chaqirgan. Hozirda ushbu holat yuzasidan tergovga qadar tekshiruv harakatlari davom etmoqda.
