IIVda katta tozalash. Tizimda qator rahbarlar ishdan olindi, 29 trln so‘mlik kiberjinoyat to‘xtatildi
IIV hay’at yig‘ilishida kadrlar masalasi ko‘rib chiqildi. Kamchiliklarga yo‘l qo‘ygan 6 nafar shahar va tuman IIB boshlig‘i, jamoat xavfsizligi bo‘yicha 2 nafar o‘rinbosar va viloyat IIBlarining 2 nafar mas’ul rahbari lavozimidan ozod etilgan.. Shuningdek, 7 nafar rahbarga qattiq intizomiy jazo berildi. Aksincha, jinoyatchilikning oldini olishda eng yaxshi natija ko‘rsatgan Toshkent, Samarqand va Farg‘ona viloyatlari IIB hamda qator tuman boshliqlari rag‘batlantirilgan.
Tadbirda ma’lum qilinishicha, yarim yillikda kiberjinoyatchilikka qarshi kurashish natijasida 9 282 ta jinoyat fosh etilgan. Markaziy bank bilan hamkorlikdagi tizim orqali 29 trillion so‘m mablag‘ning chetga noqonuniy chiqib ketishi to‘xtatildi hamda jinoyatga aloqador 18 838 ta bank kartasi bloklandi.
Shu bilan birga, 6 oy davomida kelib tushgan 205 mingdan ortiq murojaatning 87,7 foizi qanoatlantirilgani qayd etilgan. Yig‘ilish yakunida Mustaqillikning 35 yilligi bayrami munosabati bilan barcha shaxsiy tarkibni kuchaytirilgan xizmat rejimiga o‘tkazish topshirilgan.
