Hindiston Orol dengizi atrofidagi ekologik tiklash ishlari uchun $1 mln ajratadi
Hindiston Orol dengizi hududida olib borilayotgan ekologik tiklash ishlarini qo‘llab-quvvatlash uchun 1 million dollar grant ajratadi. Bu haqda Hindiston bosh vaziri Narendra Modi O‘zbekistonga davlat tashrifi doirasida prezident Shavkat Mirziyoyev bilan o‘tkazilgan muzokaralarda ma’lum qildi.
Tomonlar O‘zbekistonning “Yashil makon” umummilliy loyihasi va Hindistonning “Ek Ped Maa Ke Naam” (“Ona nomiga bir daraxt”) tashabbusi maqsadlari o‘zaro uyg‘un ekanini qayd etdi. Shu munosabat bilan Narendra Modi Hindiston Orol dengizi hududida davom etayotgan ekologik tiklash ishlarida O‘zbekiston bilan hamkorlik qilishini bildirib, loyiha uchun 1 million dollar grant ajratilishini e’lon qildi.
Muzokaralar doirasida ikki davlat rahbari Ko‘ksaroy qarorgohi bog‘ida birgalikda daraxt ham ekdi.
Eslatib o‘tamiz, avvalroq Shavkat Mirziyoyev hamda Narendra Modi Ko‘ksaroydagi oliy darajadagi muzokaralarda o‘zaro savdo hajmini 2030-yilga borib 5 milliard dollarga yetkazish bo‘yicha maqsadli kelishuvga erishgani xabar qilingan edi.
Shuningdek, Shavkat Mirziyoyev va Bosh vazir Narendra Modi ishtirokidagi marosimda O‘zbekiston va Hindiston davlatlari o‘rtasida iqtisodiyot, ta’lim, tibbiyot hamda turizmni qamrab olgan 12 ta muhim kelishuv va qo‘shma bayonot tasdiqlangandi.
