Glinka ko‘chasidagi portlashdan so‘ng yana 10 ta gaz sizib chiqish holati aniqlandi
Toshkentda Glinka ko‘chasida 3-sentyabr kuni yer osti gaz quvuridan sizib chiqish oqibatida chaqnash sodir bo‘lganidan so‘ng gaz tarmoqlarida tekshiruv olib borildi. Tekshiruvlar davomida o‘rta va past bosimli quvurlarda jami 10 ta gaz sizib chiqish holati aniqlanib, nosozliklar bartaraf etildi. Bu haqda poytaxt hokimligi xabar berdi.
Toshkent shahar hokimligi topshirig‘i bilan bunday holatlarning takrorlanishiga yo‘l qo‘ymaslik maqsadida maxsus ishchi guruh tuzilgan. Unga Veolia Energy Tashkent, Toshkent shahar suv ta’minoti, Hududgaz Poytaxt hamda tuman gaz ta’minoti bo‘limlari mutaxassislari jalb qilingan.
Ma’lum qilindiki, hozirga qadar o‘rta bosimli gaz quvurlarida 4 ta, past bosimli quvurlarda 6 ta sizib chiqish holati aniqlangan. Ularning barchasi tezkor ravishda bartaraf etilgan.
Ayni paytda Glinka ko‘chasidagi ta’mirlash va tiklash ishlari yakunlangan. Yo‘l avtomobillar harakati uchun to‘liq ochilgan.
Shu bilan birga, Hududgazta’minot va boshqa mas’ul tashkilotlarning mobil laboratoriyalari ko‘chaga tutash hududlardagi muhandislik tarmoqlarini ehtimoliy gaz sizib chiqish holatlari bo‘yicha kompleks tekshirishda davom etmoqda. Tekshiruv natijalari yuzasidan qo‘shimcha ma’lumot berilishi bildirilgan.
