Farg‘onada qalbaki xorijiy pasportlar tayyorlab sotgan jinoiy guruh qo‘lga olindi
Davlat xavfsizlik xizmati xodimlari tomonidan Bosh prokuratura huzuridagi Iqtisodiy jinoyatlarga qarshi kurashish departamenti hamda Ichki ishlar organlari bilan hamkorlikda Farg‘ona shahrida yirik tezkor tadbir o‘tkazildi. Amaliyot davomida qalbaki xorijiy davlat fuqaroligi pasportlarini noqonuniy tayyorlash va sotish zanjirini yo‘lga qo‘ygan jinoiy guruh fosh etildi.
Tergovoldi surishtiruv ma’lumotlariga ko‘ra, Marg‘ilon shahrida istiqomat qiluvchi, 1995-yilda tug‘ilgan shaxs Farg‘ona shahrida yashovchi 1990, 1997, 1999 va 2003-yillarda tug‘ilgan to‘rt nafar tanishi bilan o‘zaro jinoiy til biriktirgan. Ushbu shaxslar maxsus uskunalar yordamida soxta hujjatlar tayyorlash bilan shug‘ullanib kelishgan.
Guruh a’zolari navbatdagi xaridorgaga qalbaki usulda tayyorlangan Turkiya Respublikasi fuqaroligi pasporti va ushbu davlatning soxta haydovchilik guvohnomasini jami 4 million so‘mga sotayotgan vaqtida huquq-tartibot idoralari vakillari tomonidan ashyoviy dalillar bilan jinoyat ustida ushlangan.
Tezkor guruh tomonidan o‘tkazilgan tintuv tadbirlari natijasida, gumonlanuvchilardan qalbaki hujjatlarni tayyorlash va aloqa o‘rnatishda foydalanilgan jami 11 dona mobil telefon apparatlari hamda 2 dona noutbuk kompyuter texnikasi tegishli tartibda hujjatlashtirilib olingan.
Ayni paytda qonunbuzarlikni sodir etgan barcha shaxslarga nisbatan O‘zbekiston Respublikasi Jinoyat kodeksining tegishli moddalari bilan jinoyat ishi qo‘zg‘atilgan. Jinoiy guruhning boshqa shu kabi qonunbuzarliklarga aloqadorligini hamda soxta hujjatlar tayyorlangan sxemani to‘liq aniqlash yuzasidan tergov harakatlari davom ettirilmoqda.
