Farg‘ona va Namanganda fuqarolarni noqonuniy Umra safariga yubormoqchi bo‘lganlar ushlandi
Farg‘ona va Namangan viloyatlarida tegishli litsenziyasiz fuqarolarni Umra ziyoratiga yuborish bilan bog‘liq noqonuniy holatlar aniqlandi. Har ikki holatda ham 2 nafardan fuqaroni Saudiya Arabistoniga jo‘natish evaziga 2200 dollardan pul talab qilingan.
Davlat xavfsizlik xizmati ma’lumotiga ko‘ra, Farg‘ona viloyatining Qo‘qon shahrida faoliyat yurituvchi sayyohlik firmasi rahbari 2 nafar fuqaroni “Umra” safariga yuborishni va’da qilib, buning evaziga 2200 dollar talab qilgan.
DXX va ichki ishlar organlari xodimlari hamkorligida o‘tkazilgan tezkor tadbir davomida firma rahbari so‘ralgan pulni olayotgan vaqtida ashyoviy dalillar bilan ushlangan.
Namangan viloyatida esa Chortoq tumanida faoliyat yurituvchi sayyohlik firmasi xodimi 2 nafar fuqaroni Umra safariga yuborish evaziga 2200 dollar talab qilgan. U kelishilgan pulning 400 dollarini oldindan olayotgan vaqtida DXX va IIB xodimlari tomonidan ushlangan.
Qayd etilishicha, mazkur sayyohlik subyektlari “Umra” ziyoratini tashkil etish bo‘yicha tegishli litsenziyaga ega bo‘lmagan.
Hozirda holatlar yuzasidan jinoyat ishlari qo‘zg‘atilib, tergov harakatlari olib borilmoqda.
