Energetika sohasida korrupsiya uchun sudlangan barcha xodimlar ishdan bo‘shatiladi
Energetika vazirligida yoqilg‘i-energetika sohasida korrupsiyaga qarshi kurashish, energiya ta’minoti barqarorligi, qarzdorliklarni qisqartirish hamda kuz-qish mavsumiga tayyorgarlik masalalari muhokama qilindi. Yig‘ilishda Prezident Administratsiyasi, Bosh prokuratura, vazirlik va idoralar hamda hokimliklar rahbariyati ishtirok etgan.
Yig‘ilishda yoz mavsumida elektr energiyasiga talab o‘tgan yilgiga nisbatan yuqori bo‘lishi qayd etilgan. Shu munosabat bilan podstansiyalar barqarorligini ta’minlash va avariya brigadalarini shay holatda tutish topshirilgan. Toshkent shahrida kuzatilgan uzilishlar yuzasidan maxsus komissiya tuzilgan; u avariya sabablari, uskunalar holati va rekonstruksiya sifatini o‘rganadi. Shuningdek, call-markazlar faoliyatini kuchaytirish va aholini avariyalar haqida vaqtida xabardor qilish vazifasi qo‘yilgan.
Energiya samaradorligi tahlil qilinib, resurslardan samarasiz foydalanayotgan ayrim yirik korxonalar faoliyati tanqid qilindi. Mas’ullarga tejash ko‘rsatkichlarini ta’minlash va eski uskunalarni yangilash topshirildi. Debitor va kreditor qarzdorlikni qisqartirish bo‘yicha qarorlar ijrosini ta’minlamagan rahbarlar qat’iy ogohlantirildi.
Sohada korrupsiyaga nisbatan murosasiz yondashuv talab etildi. Korrupsiya uchun sudlangan barcha xodimlar ishdan bo‘shatilishi belgilandi. Surxondaryo va Qashqadaryo viloyatlaridagi tizim korxonalari rahbarlari to‘liq attestatsiyadan o‘tkaziladi. Bundan tashqari, sohadagi xavf-xatarlarni tahlil qiluvchi maxsus Kengash tashkil etiladi.
Kuz-qish mavsumiga tayyorgarlik doirasida infratuzilmani ta’mirlash va avariyaviy zaxiralarni shakllantirish bo‘yicha aniq vazifalar belgilandi. Berilgan topshiriqlar ijrosi va rahbarlarning shaxsiy javobgarligi keyingi yig‘ilishlarda tanqidiy ko‘rib chiqilishi ma’lum qilindi.
