Endi fuqarolarning ismi-familiyasi yoki tug‘ilgan sanasi o‘zgarsa, davlat idoralari bazasida avtomatik yangilanadi
2026-yil 1-oktabrdan O‘zbekistonda fuqarolarning familiyasi, ismi, otasining ismi yoki tug‘ilgan sanasi o‘zgarsa, bu maʼlumotlar davlat organlari axborot tizimlarida avtomatik tarzda yangilanadi. Mazkur tartib 15-iyuldagi “Aholiga ko‘rsatilayotgan davlat xizmatlarini takomillashtirish hamda fuqarolar uchun qo‘shimcha qulayliklar yaratish chora-tadbirlari to‘g‘risida”gi prezident qarorida belgilandi.
Hujjatga binoan, adliya organlari o‘zgargan maʼlumotlarni “Elektron hukumat” tizimi orqali tegishli idoralarga yuboradi. Natijada davlat organlari fuqarolarning qo‘shimcha arizalarisiz bazalardagi maʼlumotlarni yangilaydi. Fuqaroga esa Yagona interaktiv davlat xizmatlari portali (My.gov.uz) orqali real vaqt rejimida xabarnoma yuboriladi hamda yangilangan maʼlumotlar asosida shaxsni tasdiqlovchi hujjatlar qayta rasmiylashtiriladi.
Bundan tashqari, qarorga ko‘ra 2026-yil 1-noyabrgacha ko‘chmas mulk va avtotransport vositalariga qo‘yilgan taqiqni kreditlar to‘liq to‘langandan so‘ng proaktiv (avtomatik) shaklda yechish tizimi yo‘lga qo‘yiladi.
