Elektron tijorat operatorlari uchun xabardor qilish tartibi joriy etiladi
Bu 2026-yil 22-iyundagi O‘RQ-1154-son Qonun hamda Istiqbolli loyihalar milliy agentligi direktorining 5-avgustdagi 24-son buyrug‘i bilan tasdiqlangan nizomda belgilangan.
Yangi tartib elektron savdo platformalari, buyurtmalar agregatorlari hamda raqamli striming xizmatlari operatorlariga tatbiq etiladi.
Faoliyat yuritish uchun operatorlar O‘zbekistonda yuridik shaxs sifatida davlat ro‘yxatidan o‘tgan bo‘lishi, elektron tijorat, shaxsga doir ma’lumotlar, mualliflik huquqi, iste’molchilar huquqlarini himoya qilish va reklama sohasidagi qonunchilik talablariga rioya qilishi kerak.
Shuningdek, operatorlardan tegishli axborot tizimiga ega bo‘lish, xabarnomada ko‘rsatilgan ma’lumotlarning to‘g‘riligini ta’minlash va vakolatli organning so‘roviga ko‘ra elektron tijorat subyektlari faoliyatiga oid ma’lumotlarni bepul taqdim etish talab etiladi.
Faoliyatni boshlash uchun tadbirkorlik subyekti Agentlikning axborot tizimi orqali OneID yordamida elektron xabarnoma yuboradi.
Xabarnomada yuridik shaxsning nomi, tashkiliy-huquqiy shakli, STIR, manzili, elektron pochta va telefon raqami, faoliyat yuritiladigan joy manzili va kadastr raqami, bank rekvizitlari hamda rahbar haqidagi ma’lumotlar ko‘rsatiladi.
Elektron tijorat operatorlari reyestri Agentlikning rasmiy saytida e’lon qilinadi.
