Ehtiyojmand talabalarning ijara va yotoqxona xarajatlari davlat tomonidan voucher orqali to‘lab beriladi
Prezidentning 11-sentyabrdagi PF-193-sonli farmoniga ko‘ra, yangi tartib 2027-yil 1-yanvardan e’tiboran rasman kuchga kiradi. Tizim doirasida bog‘cha to‘lovi, o‘quv markazi xarajatlari, yo‘l haqi hamda oliygohlarda kunduzgi ta’lim shaklida o‘qiyotgan talabalarning yotoqxona va xususiy xonadonlardagi bir yillik ijara to‘lovlari davlat budjeti hisobidan qoplab beriladi.
Yangi mexanizmga muvofiq, vaucherlar “mahalla yettiligi” tomonidan tasdiqlanadigan reja yoki ota-onaning murojaati asosida shakllantiriladi. Talabalar uchun ajratilgan mablag‘lar Ularning nomiga ochilgan maxsus ijtimoiy kartaga o‘tkazib beriladi. Agar ushbu muddat davomida oila “Ijtimoiy reyestr” ro‘yxatidan chiqarilsa ham, vaucherning 12 oylik amal qilish huquqi to‘liq saqlanib qoladi.
Ushbu ijtimoiy ko‘mak loyihasi nafaqat talabalarni, balki maktabgacha va umumiy o‘rta ta’lim muassasalari o‘quvchilarini ham qamrab oladi. Maktab o‘quvchilarining qo‘shimcha to‘garak va kurslarga qatnashishi uchun yo‘l xarajatlari hamda bog‘cha to‘lovlarini qoplashga oid ishlarni muvofiqlashtirish mos ravishda Maktabgacha va maktab ta’limi hamda Oliy ta’lim, fan va innovatsiyalar vazirliklari zimmasiga yuklatildi.
