EDA AI foydalanuvchilari ularning roziligisiz yillik obuna puli yechilganidan shikoyat qilgan – Raqobat qo‘mitasi
EDA AI ilovasi foydalanuvchilaridan 10 dan ortiq murojaat kelib tushdi
Raqobat qo‘mitasiga joriy yil davomida EDA AI mobil ilovasi faoliyati yuzasidan iste’molchilardan 10 dan ortiq murojaat kelib tushgan.
Murojaatlarni o‘rganish davomida foydalanuvchilar huquq va qonuniy manfaatlariga zid bo‘lishi mumkin bo‘lgan bir qator holatlar aniqlangan.
Xususan, foydalanuvchilar bir oylik obuna uchun 38 ming so‘m to‘lashga rozilik bildirgan bo‘lsa-da, karta ma’lumotlari kiritilganda yoki Payme, Click va boshqa to‘lov usullari tanlanganda, oldindan xabardor qilinmasdan va qo‘shimcha roziligisiz bir yillik obuna qiymatida mablag‘ yechib olingani haqida shikoyat qilgan. Shuningdek, bank kartalaridan mablag‘larning takroran yechib olinishi, obunani bekor qilish va asossiz yechilgan pullarni qaytarish imkoniyati mavjud emasligi, xizmat ko‘rsatuvchi bilan qayta aloqa o‘rnatish mexanizmi yo‘qligi haqida ham murojaatlar kelib tushgan.
Bundan tashqari, ilovadan foydalanishdan avval ro‘yxatdan o‘tish va telefon raqamini kiritish talabi, ilovaning ishlashidagi texnik xatolar, jumladan, oziq-ovqat mahsulotlari kaloriyasini hisoblashdagi noaniqliklar qayd etilgan.
Qo‘mita, shuningdek, EDA AI reklama materiallarida xizmat shartlari to‘liq va aniq ko‘rsatilmaganini, xususan, “Ilovani hozir yuklab oling va bepul sinab ko‘ring”, “Oson ozing” kabi da’vatlar iste’molchilarda xizmatdan foydalanish shartlari haqida noto‘g‘ri tasavvur shakllantirishi mumkinligini bildirgan.
Mazkur holatlar “Iste’molchilarning huquqlarini himoya qilish to‘g‘risida”gi qonun talablari asosida o‘rganilgan. Qonunga ko‘ra, xizmat ko‘rsatuvchi iste’molchiga xizmat haqida o‘z vaqtida zarur, to‘g‘ri va tushunarli ma’lumot berishi, xizmatlarni belgilangan shartlar asosida ko‘rsatishi hamda iste’molchilarning qonuniy talablarini qanoatlantirishi lozim.
Shundan so‘ng Raqobat qo‘mitasi tomonidan “Thinking apps” MChJga EDA AI mobil ilovasidan foydalanish jarayonida iste’molchilar murojaatlarida qayd etilgan va ularning manfaatlariga zid bo‘lgan holatlarni bartaraf etish bo‘yicha ko‘rsatma yuborilgan.
Kompaniyaga iste’molchilar bilan munosabatlarda, shuningdek, reklama va marketing faoliyatida “Iste’molchilarning huquqlarini himoya qilish to‘g‘risida”gi hamda “Reklama to‘g‘risida”gi qonunlar talablariga rioya qilish zarurligi ham ko‘rsatilgan.
