Dushanbeda mintaqaning eng baland osmono‘par binosi quriladi
Tojikiston prezidenti Emomali Rahmon va Dushanbe meri Rustam Emomali Shohmansur tumanidagi 29 gektar maydonni egallaydigan yirik ko‘p funksiyali me’moriy majmua qurilishini rasman boshlab berdi. “TAS International Group” tomonidan amalga oshirilayotgan va 5 yilga mo‘ljallangan ushbu ulkan loyiha doirasida Markaziy Osiyodagi eng baland bino hisoblangan 77 qavatli “Dushanbe minorasi” bo‘y ko‘taradi.
Umumiy loyiha doirasida 52 ta turli obyekt, jumladan 6 160 xonadondan iborat 42 ta turar joy binosi, 5 ta osmono‘par bino, yirik savdo-ko‘ngilochar markazi va 1000 o‘rinli konsert zali barpo etiladi. Shuningdek, yangi mavzeda 1200 o‘rinli zamonaviy maktab, 500 o‘rinli bog‘cha, mehmonxonalardan tortib sun’iy ko‘l hamda sport majmualarigacha qad rostlaydi.
E’tiborlisi, ushbu megaloyiha dizayni ustida ishlayotgan “Cool Design Studio” vakillariga ko‘ra, qurilish va loyihalash jarayonlarida Tojikiston pudratkorlaridan tashqari O‘zbekiston, Rossiya va BAAning ixtisoslashtirilgan kompaniyalari ham faol qatnashadi. Obyekt to‘liq foydalanishga topshirilgach, poytaxtda 4 300 dan ortiq yangi ish o‘rni yaratilishi ko‘zda tutilgan.
