Dehliga uchayotgan 5 kishi tanasiga yashirilgan 1,1 milliard so‘mlik oltin bilan ushlandi
Davlat xavfsizlik xizmatining Namangan viloyati bo‘yicha boshqarmasi hamda viloyat Bojxona boshqarmasi xodimlari hamkorligida tezkor tadbir o‘tkazildi. Unda “Namangan – Dehli” yo‘nalishidagi aviareys orqali xorijga uchib ketmoqchi bo‘lgan Andijon va Farg‘ona viloyatlarida yashovchi 5 nafar fuqaro belgilangan tartibda ko‘zdan kechirilgan.
Tekshiruvlar davomida ushbu shaxslar noqonuniy yo‘l bilan boylik orttirish maqsadida jami 555 gramm o‘lchamdagi quyma oltin bo‘laklari hamda 200 gramm og‘irlikdagi zargarlik buyumlarini o‘z tanalariga yashirib olganliklari ma’lum bo‘lgan. Mutaxassislarning dastlabki baholashiga ko‘ra, ushlanib qolingan qimmatbaho metallar va taqinchoqlarning umumiy qiymati taxminan 1,1 milliard so‘mni tashkil qilmoqda.
Hozirda mazkur kontrabanda holati yuzasidan huquq-tartibot organlari tomonidan tergovga qadar tekshiruv harakatlari olib borilmoqda. Qonunbuzarlarga nisbatan tegishli tartibda chora ko‘rilishi kutilmoqda.
