Chiqindini duch kelgan joyga tashlaganlar 10 mln so‘m jarimaga tortilyapti
Qashqadaryo viloyati Ekologiya va iqlim o‘zgarishi bosh boshqarmasi tomonidan Qarshi shahri hamda tumanida navbatdagi nazorat tadbirlari o‘tkazildi. Reyd davomida “Shoxbekat”, “Rog‘uzar” hamda “Shoyxuja” mahalla fuqarolar yig‘inlari hududlarida maishiy chiqindilarni belgilanmagan joylarga noqonuniy ravishda tashlash bilan bog‘liq yettita holat qayd etilgan.
Barcha huquqbuzarlarga nisbatan Ma’muriy javobgarlik to‘g‘risidagi kodeksning 91¹-moddasi tegishli qismlari bo‘yicha ma’muriy bayonnomalar rasmiylashtirilgan. Fuqarolardan biriga (Sh.R.) 4 million 120 ming so‘m, qolgan olti nafar shaxsga esa 1 million 236 ming so‘mdan jarima belgilangan.
Eko-nazorat tadbirlari hududlarda o‘rnatilgan kuzatuv kameralari yordamida ham uzluksiz olib borilmoqda. Ushbu onlayn kameralar noqonuniy chiqindixonalarning hosil bo‘lishi hamda boshqa ekologik huquqbuzarliklarni o‘z vaqtida aniqlab, ularga chora ko‘rish imkonini bermoqda.
