Chet el fuqarolarini mukofotlash uchun “O‘zbekiston ehtiromi” ordeni ta’sis etiladi
Oliy Majlis Qonunchilik palatasi deputatlari ushbu qonun loyihasini qabul qilib, tasdiqlash uchun Senatga yubordi.
Yangi ta’sis etilayotgan mukofot ikki darajadan iborat bo‘ladi. Xususan, “Oliy darajali O‘zbekiston ehtiromi” ordeni strategik sheriklikni rivojlantirish, xalqaro va mintaqaviy xavfsizlik hamda tinchlikni mustahkamlashga ulkan hissa qo‘shgan xorijiy davlat va hukumat rahbarlari, xalqaro tashkilotlar yetakchilari va taniqli jamoat arboblariga berilishi nazarda tutilgan.
Nisbatan quyi bosqichdagi “O‘zbekiston ehtiromi” ordeni bilan esa mamlakat manfaatlarini xalqaro maydonda ilgari surgan, davlat va jamiyat rivojiga hissa qo‘shgan xorijiy diplomatlar, yirik kompaniya rahbarlari, elchilar hamda insonparvarlik va xayriya faoliyatini olib borayotgan chet el fuqarolari taqdirlanishi mumkin.
Soha mas’ullarining ta’kidlashicha, ushbu orden xalqaro hamkorlarning O‘zbekiston bilan aloqalarni rivojlantirishdagi mehnatini yuqori baholash va davlatlararo do‘stlik aloqalarini yanada mustahkamlashga xizmat qiladi.
