Chegara ostidagi noqonuniy tunnellar uchun alohida jinoiy javobgarlik belgilanmoqda
Senatorlarning ta’kidlashicha, 2016-yildan 2025-yilga qadar respublika davlat chegarasida 12 ta noqonuniy yerosti tunneli aniqlangan. Ushbu yashirin yo‘llar orqali tovar-moddiy boyliklar, xorijiy valyuta qimmatliklari hamda noqonuniy mahsulotlarni mamlakatga yashirincha olib kirish holatlari kuzatilgan. Shu sababli Jinoyat hamda Jinoyat-protsessual kodekslariga tegishli o‘zgartirish va qo‘shimchalar kiritilmoqda.
Yangi qonun normalariga ko‘ra, noqonuniy yerosti tunnellarini va boshqa infratuzilma obyektlarini barpo etish, ulardan foydalanish, ushbu faoliyatni tashkil qilish yoki moliyalashtirish bo‘yicha aniq jinoiy javobgarlik choralari kiritildi. Shuningdek, bunday yashirin inshootlardan foydalangan holda chegarani noqonuniy kesib o‘tish yoki kontrabanda jinoyatlarini sodir etganlik uchun jazolar sezilarli darajada kuchaytiriladi.
Shu bilan birga, hujjatda insonparvarlik tamoyili ham nazarda tutilgan. Agar ushbu qilmishni birinchi marta sodir etgan shaxs yerosti tunneli haqida o‘z ixtiyori bilan huquq-tartibot organlariga xabar bersa va jinoyatni fosh etishda faol ko‘maklashsa hamda uning harakatida boshqa jinoyat tarkibi bo‘lmasa, u jinoiy javobgarlikdan ozod etilishi mumkin. Noqonuniy tunnellar bilan bog‘liq ishlar bo‘yicha dastlabki tergov vakolati Davlat xavfsizlik xizmati (DXX) tergovchilariga yuklatildi.
