Bo‘stonliqda 320 ming yillik tosh qurollar topildi
O‘zbekiston Fanlar akademiyasi Antropologiya instituti hamda Rossiya Fanlar akademiyasi mutaxassislaridan iborat qo‘shma ekspeditsiya 2024-yildan buyon Arkutsoy yodgorligida uchta alohida maydonda arxeologik qazishmalarni davom ettirmoqda. Mutaxassislar ushbu hududdan topilayotgan buyumlarning geologik o‘rnini hamda qadimgi odamlarning o‘zlashtirish bosqichlarini o‘rganishmoqda.
So‘nggi tadqiqotlar natijasida geologik kesmaning turli sathlarida, xususan, birinchi, ikkinchi va uchinchi qazilma tuproq qatlamlarida inson qo‘li bilan ishlov berilgan tosh qurollar borligi tasdiqlandi. Turli davrlarga oid qatlamlardagi bu topilmalar qadimgi insonlar jamoasi ushbu hududda bir necha bosqichda istiqomat qilganidan dalolat beradi.
Ayniqsa, 320-280 ming yil avval shakllangani taxmin qilinayotgan uchinchi qatlamdagi topilmalar alohida ahamiyatga ega. Agar ushbu yosh laboratoriya tahlillarida o‘z tasdig‘ini topsa, Arkutsoy O‘zbekistondagi eng qadimgi arxeologik yodgorlikka aylanadi hamda hududning ilk paleolit davridayoq o‘zlashtirilganini isbotlaydi.
Avvalroq Qashqadaryoda IV-V asrlarga oid qadimiy ibodatxona va noyob devoriy gullar tasviri topilgan edi.
