Bolaga qo‘l ko‘targan pedagoglar maktab va bog‘chalardan bir yilga chetlashtiriladi
2026-yil 11-sentyabr kuni qabul qilingan O‘RQ–1174-sonli qonunga muvofiq, Ma’muriy javobgarlik to‘g‘risidagi kodeksga tegishli o‘zgartirish va qo‘shimchalar kiritildi. Yangi normalarga ko‘ra, ta’lim-tarbiya jarayonida bolaga nisbatan jismoniy zo‘ravonlik ishlatgan, uning qadr-qimmatini kamsitgan shaxslarga, agar ularning harakatlarida jinoyat alomatlari bo‘lmasa, BHMning 1 baravaridan 5 baravarigacha miqdorda jarima solinadi.
Shuningdek, pedagogik faoliyat davomida bolalarga nisbatan jismoniy yoki ruhiy zo‘ravonlik sodir etgani uchun javobgarlikka tortilgan shaxslarga maxsus cheklov o‘rnatildi. Ular bir yil davomida maktabgacha ta’lim, umumta’lim, o‘rta maxsus, professional hamda qo‘shimcha ta’lim tashkilotlarida pedagogik faoliyat bilan shug‘ullanish huquqidan mahrum etiladi.
Qonun bilan aliment to‘lash tartibiga ham muhim o‘zgartirishlar kiritildi. Unga ko‘ra, davlat yoki nodavlat muassasalarining to‘liq ta’minotida bo‘lgan bolalar uchun ota-onani aliment to‘lashdan ozod qilish taqiqlandi. Ota-ona qaramog‘idan mahrum bo‘lgan bolalar foydasiga undiriladigan aliment miqdorini kamaytirishga oid sud ishlariga esa “Inson” ijtimoiy xizmatlar markazlari majburiy tartibda jalb etiladi. Mazkur qonun rasmiy e’lon qilingan kundan e’tiboran kuchga kirdi.
