Bir kunda Toshkent ko‘chalarini 1,5 million mashina egalladi. 22 ta YTH va qariyb 5 mingta qoidabuzarlik
Toshkent shahar Yo‘l harakatini tashkil etish markazi ma’lumotlariga ko‘ra, 4-sentyabr kuni poytaxt ko‘chalarida jami 1 million 502 ming 57 ta transport vositasi qatnovi qayd etilgan. Bu ko‘rsatkich oldingi kunga nisbatan bir foizga, ya’ni qariyb 15 mingta avtomobilga ko‘payganini ko‘rsatadi. Avtomobillar oqimining ortishi natijasida ertalabki va kechki tig‘iz vaqtlarda shaharning yettita yirik chorrahasida tirbandlik darajasi 7 ball va undan ham yuqori nuqtaga chiqqan. Vaziyatni yumshatish maqsadida muammoli hududlarda svetoforlarning yashil chirog‘i vaqti uzaytirilib, harakatni qo‘lda tartibga solish uchun qo‘shimcha YPX inspektorlari jalb qilingan.
Xuddi shu kuni jamoat transportiga bo‘lgan yuklama ham yuqoriligicha qolgan. Xususan, poytaxtdagi 170 ta yo‘nalish bo‘ylab xizmat ko‘rsatgan 1 670 ta avtobus yordamida 1 million 228 mingdan ziyod yo‘lovchi tashilgan. Yerosti transporti hisoblangan Toshkent metrosi xizmatidan foydalangan fuqarolar soni esa 862 ming nafardan oshgani ma’lum qilingan.
Biroq ko‘chalardagi tirbandliklar va shoshqaloqlik ko‘plab qonunbuzarliklarga ham sabab bo‘lmoqda. Birgina sutka davomida poytaxt hududida yo‘l harakati qoidalarini mensimaslik bo‘yicha 4 751 ta holat aniqlangan. Eng achinarlisi, kun davomida jami 22 ta yo‘l-transport hodisasi sodir bo‘lgan va oqibatda to‘rt nafar fuqaro og‘ir tan jarohatlari olgan.
