Banklar kiberfiribgarlikning oldini olmasa, mijozga yetkazilgan zararni qoplaydi
Oliy Majlis Qonunchilik palatasining navbatdagi majlisida kiberxavfsizlikni ta’minlash hamda raqamli muhitda sodir etilayotgan huquqbuzarliklarga qarshi kurashish tizimini yanada takomillashtirishga qaratilgan qonun loyihasi ikkinchi o‘qishda moddama-modda ko‘rib chiqildi.
Qayd etildiki, qonun loyihasi ikkinchi o‘qishga tayyorlash jarayonida deputatlar tomonidan bildirilgan takliflar asosida uning qator normalari qayta ko‘rib chiqilgan va huquqni qo‘llash amaliyotidan kelib chiqib yanada takomillashtirilgan.
Xususan, “To‘lovlar va to‘lov tizimlari to‘g‘risida”gi Qonunga kiritilayotgan o‘zgartishlarga ko‘ra, agar kiberxavfsizlik talablariga rioya etilmagani yoki shubhali (frod) operatsiyalarning oldini olish bo‘yicha zarur choralar ko‘rilmagani oqibatida fuqarolarga moddiy zarar yetkazilsa, ushbu zarar banklar, to‘lov tizimi operatorlari yoki to‘lov tashkilotlari tomonidan qoplanishi nazarda tutilmoqda.
Deputatlar ta’kidlashicha, mazkur norma moliyaviy xizmatlar bozori ishtirokchilarining axborot xavfsizligini ta’minlash borasidagi mas’uliyatini oshirish, shuningdek, fuqarolarning mablag‘larini kiberfiribgarliklardan yanada ishonchli himoya qilishga xizmat qiladi.
Majlisda qonun loyihasi qabul qilindi va Senatga yuborildi.
