Ayollar kiyimidagi tojikistonlik migrantlar Rossiyadan deportatsiya qilinadi
Moskvaning Lyublin tumani sudi Tojikiston fuqarolari Hasanjon Rahimov hamda Yorg‘ibegi Saizodani 10 sutkalik ma’muriy qamoq jazosiga mahkum etdi. Hukmga ko‘ra, ular jazo muddatini o‘tab bo‘lgach, Rossiya Federatsiyasi hududidan majburiy ravishda deportatsiya qilinadi.
Ushbu migrantlar 18-avgust kuni poytaxtdagi “Sadovod” savdo majmuasi hududida qo‘lga olingan. Politsiya xodimlarining rasmiy bildirishnomasida ko‘rsatilishicha, fuqarolar “tanlov erkinligi” yozuvi tushirilgan ayollar libosini kiyib, jamoat joyida noan’anaviy jinsiy munosabatlarni targ‘ib qilgan. Biroq huquqni muhofaza qiluvchi organlar kiyimning aynan qaysi belgilarga ko‘ra ayollar libosi deb topilganiga aniqlik kiritmagan.
Sud majlisida ma’lum bo‘lishicha, ayblanuvchilarning ikkalasi ham oilali kishilar hisoblanadi. Jumladan, Rahimovning bir nafar, Saizodaning esa voyaga yetmagan to‘rt nafar farzandi bor. Shunga qaramay, sud ularning harakatlarini ma’muriy huquqbuzarlik deb topib, mamlakatdan chiqarib yuborish qarorini o‘z kuchida qoldirdi.
