Aviareyslar kechikkanda yo‘lovchilarga kompensatsiya to‘lanishi holatlari o‘rganilmoqda
Havo transporti xizmatlari bo‘yicha iste’molchilarning murojaatlari 2026-yilning birinchi yarmida o‘tgan yilning mos davriga nisbatan 4,1 barobarga ko‘payib, 300 dan ortiqni tashkil etgan.
Murojaatlarda reyslarning bir necha soatga kechikishi, yo‘lovchilarga o‘z vaqtida aniq axborot berilmasligi, sifatsiz xizmat ko‘rsatilishi hamda ko‘rsatilmagan xizmatlar uchun haq olinishi kabi holatlar qayd etilgan.
Qo‘mita tahlillariga ko‘ra, ayrim hollarda tashuvchining aybi bilan kechikkan reyslar bo‘yicha yo‘lovchilarga kompensatsiya yoki muqobil yechim taklif etilmagan.
Shu munosabat bilan Qo‘mita mahalliy aviareylar tashuvchining aybi bilan kechikkan holatlarda yo‘lovchilarga kompensatsiya to‘lanishi va iste’molchilar huquqlariga rioya etilishini ochiq manbalar asosida o‘rganmoqda.
Qo‘mita aviakompaniyalardan raqamli platformalaridagi axborotlarni to‘liq taqdim etish va ularni qonunchilik talablariga muvofiqlashtirishni so‘ragan.
Fuqarolar esa sohadagi taklif va e’tirozlari yuzasidan Raqobat qo‘mitasiga murojaat qilishlari mumkin.
