Arxeologlar Surxondaryoda antik davrga oid qadimiy harbiy istehkomni aniqladi
O‘zbekiston janubida, qadimgi Baqtriya va Sug‘diyona chegarasidagi "Iskandar-tepa" yodgorligi o‘rnida 2 ming yillik ellinistik harbiy lager qoldiqlari aniqlandi. Mazkur tadqiqotni Karlov universiteti olimi Ladislav Stancho rahbarligidagi chex-o‘zbek qo‘shma arxeologiya ekspeditsiyasi olib bordi.
Olimlar hududda magnit o‘lchovlari va georadar yordamida qidiruv o‘tkazib, so‘ngra nuqtali qazish ishlarini bajardi. Izlanishlar natijasida 1,2 gektar maydonni o‘rab turgan, uzunligi qariyb 400 metrli xandoq (rov) topildi. Shuningdek, yog‘ochdan yasalgan mudofaa inshootlari izlari, o‘nlab qabr chuqurlari va suv saqlash uchun mo‘ljallangan yirik sopol idishlar (xumlar) qazib olindi.
Tadqiqotchilarning xulosasiga ko‘ra, bu joy ilgari taxmin qilinganidek oddiy qishloq emas, balki qisqa muddatli harbiy lager bo‘lgan. Obyektning balandlikda joylashgani, mudofaa xandog‘ining mavjudligi, doimiy turar joy binolarining yo‘qligi hamda yunon-baqtriya hukmdorlari Evtidem I va Demetriy I davriga oid tangalar topilgani buni tasdiqlaydi.
GreekReporter nashrining qayd etishicha, Markaziy Osiyoda bunday vaqtinchalik yunon harbiy lagerlarining izlari yer yuzasida deyarli saqlanib qolmagani sababli, ularni aniqlash juda kamdan-kam kuzatiladigan hodisa hisoblanadi. Bu borada arxeologlarga geofizik uslublar yordam berdi.
