AQShda O‘zbekiston fuqarosi 13 yoshli qizni zo‘rlashda aybdor deb topildi
Mahoning okrugi sudida uch kun davom etgan sud jarayoni yakunida hakamlar hay’ati Shavkat Abshukurovga nisbatan ayblov hukmini chiqardi. U ikki holatda zo‘rlash, ikki holatda voyaga yetmagan shaxs bilan noqonuniy jinsiy aloqa, ikki holatda jinsiy tajovuz hamda odam o‘g‘irlashda aybdor deb topilgan.
Sud materiallariga ko‘ra, voqea 2019-yil avgustida Ogayo shtatining North Jackson hududida yuz bergan. O‘sha paytda 13 yoshdagi voyaga yetmagan qiz yordam so‘rab yuk mashinasi haydovchisi Abshukurovga murojaat qilgan. Prokuratura ma’lumotlariga ko‘ra, haydovchi Abshukurov qizni o‘z yuk mashinasi tirkamasiga aldab olib kirib, uni zo‘rlagan. Shundan so‘ng u jabrlanuvchini yaqin atrofdagi yuk mashinalari to‘xtash joyida tushirib qoldirgan.
Voqea joyiga Ogayo shtati yo‘l patruli va Mahoning okrugi sherifi xodimlari yetib kelgan. Ular qizni tibbiy yordam ko‘rsatish uchun shifoxonaga olib borgan. Tergov yakunlariga ko‘ra, Sh.A. hibsga olinib, unga nisbatan ayblov e’lon qilingan.
Tergov qariyb uch yil davom etgan. Huquq-tartibot idoralari telefon ma’lumotlari, jabrlanuvchining fotosurat orqali tanib olishi hamda DNK dalillari asosida Abshukurovni aniqlagan. U 2022-yilda hibsga olingan.
Sudda Abshukurov o‘zini aybsiz deb hisoblashini bildirgan. Biroq hakamlar hay’ati uni barcha yettita ayblov bo‘yicha aybdor deb topdi. Hozircha unga jazo tayinlanadigan sana va qamoq muddati ma’lum qilinmagan.
