Andijondagi tug‘uruqxonada besh egizak dunyoga keldi
6-iyul kuni Andijon shahar 2-son tug‘uruq majmuasida 5 nafar egizak dunyoga keldi. Bu haqda Sog‘liqni saqlash vazirligi matbuot kotibi Furqat Sanayev ma’lum qildi.
Andijon shahridagi “Qayrag‘ochtosh” mahallasida istiqomat qiluvchi Nargiza Bekjonova ko‘p homilalik tashxisi bilan tug‘uruq muassasasiga qabul qilingan. Unda muddatidan ilgari tug‘uruq jarayoni boshlangani sababli kesarcha kesish amaliyoti bajarilgan. Tug‘uruq jarayoni akusher-ginekolog, neonatolog va reanimatologlar tomonidan muvaffaqiyatli o‘tkazilgan.
Dunyoga kelgan chaqaloqlarning vazni quyidagicha qayd etildi:
• Birinchi chaqaloq: qiz, vazni 1450 gramm;
• Ikkinchi chaqaloq: o‘g‘il, vazni 1605 gramm;
• Uchinchi chaqaloq: qiz, vazni 1495 gramm;
• To‘rtinchi chaqaloq: o‘g‘il, vazni 1585 gramm;
• Beshinchi chaqaloq: qiz, vazni 1205 gramm.
Ixtisoslashtirilgan tibbiy xizmat ko‘rsatish maqsadida ona va chaqaloqlar Respublika ixtisoslashtirilgan ona va bola salomatligi ilmiy-amaliy tibbiyot markazi Andijon viloyati filialiga o‘tkazildi.
Vazirlik xabar qiladiki, ayni paytda besh nafar egizak va ularning onasi malakali tibbiyot xodimlari nazoratida bo‘lib, ahvoli yaxshi baholanmoqda.
