Andijonda “Soliq”dan soxta keshbek orqali 38,3 mlrd so‘m o‘marganlarga jinoiy ish ochildi
Andijon viloyatida qalbaki hujjatlar bilan soliqdan 38 mlrd so‘m o‘zlashtirganlarga jinoiy ish qo‘zg‘atildi. Bu haqda Bosh prokuratura huzuridagi Iqtisodiy jinoyatlarga qarshi kurashish Departamenti xabar berdi.
Tekshiruvlar davomida bir necht afuqarolar o‘zaro til biriktirib, 5 ta MCHJga boshqa MCHJlar tomonidan 2,2 trln so‘mlik mahsulotlar yetkazib berilganligi haqida sohta elektron hisob-fakturalarni rasmiylashtirgan. Ular go‘yoki savdodan tushgan pullarni nazorat kassa mashinalari orqali kirim qilib, fuqarolarga sotganligi haqida xarid cheklarini chiqarib, 94 921 nafar fuqaro va ijtimoiy himoya reyestriga kiritilgan shaxslarga “Soliq Mobile” ilovasi orqali “Keshbek” sifatida to‘lab bergan. Oqibatda 38,3 mlrd so‘m budjet mablag‘ini o‘zlashtirish va rastrata qilish yo‘li bilan talon-toroj qilgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
