Andijonda 220 ming so‘mga sotilayotgan gaz balloni bo‘yicha “Hududgazta’minot” rasmiy bayonot berdi
“Hududgazta’minot” AJ ushbu holat bo‘yicha rasmiy munosabat bildirib, davlat tomonidan yetkaziladigan gaz narxi o‘zgarmaganini va xabarlar asossiz ekanini ma’lum qildi.
Rasmiy tashkilot ta’kidlaydiki, gaz ballonlarini faqat "Ijtimoiy reyestr"ga kiritilgan fuqarolarga tarqatish bo‘yicha hech qanday cheklov yoki buyruq mavjud emas. Maishiy gaz ballonlari tasdiqlangan reja-grafik asosida hududdagi barcha aholi xonadonlariga birdek va uzluksiz yetkazib berilmoqda.
Shu bilan birga, ijtimoiy tarmoqlarda muhokama qilinayotgan 220 ming so‘mlik narx xususiy subyektlarga tegishli. Prezident qaroriga asosan, suyultirilgan gaz ta’minotiga xususiy sektorni jalb etish tajribasi aynan Andijonda boshlangan bo‘lib, bu narx tadbirkorlarning ballonni to‘ldirish va xonadonga yetkazib berish tijorat xizmati uchun belgilangan.
Davlat tomonidan aholiga ajratiladigan suyultirilgan gazning rasmiy narxi esa barqaror saqlanib qolmoqda. Unga ko‘ra, gazning 1 litri 2 000 so‘m bo‘lib, bitta standart gaz balloni aholiga o‘rtacha 40 000 so‘m atrofida yetkazilmoqda. Shunga qaramay, xususiy bozor narxlarini tartibga solish va xavfsizlik talablari bo‘yicha ochiq savollar hamon saqlanib qolmoqda.
