Anadoludan Turkistongacha uzangan adabiy ko‘prik: Turkiyada “Turk dunyosi she’riyat antologiyasi” da turkiy xalqlar ijodkorlari jam bo‘ldi
Yevroosiyo Yozuvchilar uyushmasi qoshidagi “Bengü Yayınları” nashriyotida chop etilgan “Turk dunyosi she’riyat antologiyasi” Anadoludan Turkistongacha uzangan keng jug‘rofiy hududning poetik manzarasini aks ettiradi. Kitobdan Qozog‘iston, O‘zbekiston, Qirg‘iziston, Turkmaniston, Ozarbayjon, Qoraqalpog‘iston va Turkiyadan yetishib chiqqan turli avlodga mansub ijodkorlarning saralangan asarlari joy olgan.
Loyiha muallifi – turk tili va adabiyoti bo‘yicha tadqiqotchi, Xoja Ahmad Yassaviy nomidagi Xalqaro turk-qozoq universiteti o‘qituvchisi Fotih Sulton Yilmaz. U turli turkiy shevalarda bitilgan asarlarni saralab, Turkiya turkchasiga o‘girish va tahrir qilish ishlarini shaxsan amalga oshirdi.
Antologiyaga o‘zbek adabiyotidan Abdulla Oripov, Usmon Azim, Sirojiddin Sayyid kabi ustoz san’atkorlar bilan birga G‘ayrat Majid, Botirjon Ergashev, Guljamol Asqarova, Feruza Xayrullayeva, Nozima Habibullayeva, Rahmon Ergench, Hulkar Sherzodova, Niyatullo Elbek o‘g‘li, Yulduz Ormanova, Allayar Darmenov hamda Mansur Jumayev kabi iste’dodli shoirlarning she’rlari kiritilgan.
“Turkiy dunyoning boy she’riy merosini kengroq kitobxonlar ommasiga yetkazishni maqsad qilgan ushbu asar mushtarak madaniyatimiz va adabiy hamjihatligimizning yanada mustahkamlanishiga hissa qo‘shishiga umid qilaman”, deb yozadi muallif.
O‘zbek adabiyotiga qaratilgan izchil e’tibor
Fotih Sulton Yilmaz uchun o‘zbek adabiyoti begona emas. Tadqiqotchi avvalroq O‘zbekiston xalq shoiri Usmon Azim tavalludining 75 yilligi munosabati bilan “O‘zbek adabiyotining bir fidoiysi: Usmon Azim (davr, shaxsiyat, asar)” nomli ilmiy kitobini nashr ettirgan edi. Uch bobdan iborat ushbu monografiyada shoirning poetik dunyosi va adabiy portreti ilmiy metodlar asosida tahlil qilingan.
Bundan tashqari, Yilmaz Usmon Azim she’rlaridan iborat “Sessizce oturdum dünya içinde” nomli alohida tarjima to‘plamini ham turk o‘quvchilariga taqdim etgan. Qolaversa, o‘zbek shoir va yozuvchilarining ijodiy ishlarini doimiy ravishda turk tiliga tarjima qilib, Turkiyaning nufuzli “Kaedesh Kalemler” jurnalida nashr ettirib boradi.
Muallif va shoir haqida ma’lumot
Fotih Sulton Yilmaz (1995-y.): Trabzonning Ortahisar tumanida tug‘ilgan. Zamonaviy turk lahjalari va adabiyotlari yo‘nalishida magistr darajasini olgan. U markaziy osiyolik ko‘plab shoirlarning asarlarini turk tiliga o‘girib kelmoqda. Ilmiy-ijodiy izlanishlari mahsuli o‘laroq “Abayning o‘lim bilan sinovi” (2024), “O‘zbek adabiyotining bir fidoiysi: Usmon Azim” (2025) kabi qator kitoblari nashr etilgan.
