Aktrisa Yodgora Ziyomuhammedova 74 yoshida vafot etdi
O‘zbekiston Respublikasida xizmat ko‘rsatgan artist, teatr va kino san’atining taniqli vakili Yodgora Ziyomuhammedova 74 yoshida vafot etdi. Bu haqda Madaniyat vazirligi xabar berdi.
Ma’lumot uchun, Yodgora Ziyomuhammedova 34 yildan ziyod O‘zbekiston davlat yosh tomoshabinlar teatrida samarali ijod qilib, sahnada 100 ga yaqin turli obrazlarni yaratgan. Uning “Qizil shapkacha”da Qizil shapka, “Zumrad va Qimmat”da Qimmat, “Farzandim jigarbandim”da Sanobar, “Sening taqdiring”da Nazira, “Yarash-yarash”da Pokiza, “Burgut”da Gulnur, “Birinchi muallim”da Oltinoy kabi obrazlari tomoshabinlar mehri va e’tiboriga sazovor bo‘lgan.
Aktrisa televideniye va kino sohalarida ham samarali ijod qilib, “Oqshom ertaklari” ko‘rsatuvini 25 yil davomida olib borgan.
1992-yilda Yodgora Ziyomuhammedovaga “O‘zbekistonda xizmat ko‘rsatgan artist” faxriy unvoni berilgan. 2021-yilda esa u “Mehnat shuhrati” ordeni bilan taqdirlangan.
