Aholi endi ishini eplay olmagan “uchastkovoy”ga ishonchsizlik bildirishi mumkin bo‘ladi
Mamlakatda profilaktika inspektorlari faoliyatini tartibga soluvchi va ularning vakolatlarini aniq belgilovchi alohida qonun loyihasi ko‘rib chiqildi. Yangi hujjat bilan “uchastkovoy”larning asosiy vazifalari, huquq va majburiyatlari, javobgarligi hamda xizmat o‘tash tartibi qonuniy jihatdan mustahkamlanadi. Shu bilan birga, xodimlarni o‘z xizmat vazifasiga kirmaydigan qo‘shimcha ishlarga va noqonuniy topshiriqlarga jalb etish qat’iyan man etiladi.
Aholi bilan muloqotni yaxshilash va ochiqlikni ta’minlash maqsadida inspektorlarning jamoatchilik oldidagi hisobdorligi oshirilmoqda. Yangi tartibga ko‘ra, har bir profilaktika inspektori har chorakda o‘ziga biriktirilgan mahalla va hudud aholisi oldida bajarilgan ishlar yuzasidan hisobot berishi shart bo‘ladi. Eng muhim yangiliklardan biri – agarda inspektor o‘z vazifasini lozim darajada bajarmasa, aholi tomonidan unga nisbatan “ishonchsizlik tashabbusi”ni bildirish mexanizmi joriy etiladi.
Shu bilan bir qatorda, qonun loyihasida profilaktika inspektorlarining ijtimoiy va huquqiy himoyasi ham nazarda tutilgan. Xodimlarning sha’ni hamda qadr-qimmati davlat himoyasiga olinib, ularga munosib mehnat haqi to‘lash, xizmat va uy-joy sharoitlarini yaxshilash hamda natija ko‘rsatgan xodimlarni rag‘batlantirish kafolatlanadi. Deputatlarning ta’kidlashicha, ushbu o‘zgarishlar mahallalarda xavfsiz muhit yaratish va huquqbuzarliklarning oldini olish samaradorligini oshirishga xizmat qiladi.
