Afsonaviy qilichboz Sobirjon Ruziyev 74 yoshda vafot etdi
O‘zbekiston qilichbozlik federatsiyasi afsonaviy sportchi, Olimpiya o‘yinlari kumush medali sohibi va uch karra jahon chempioni Sobirjon Sabitovich Ruziyev vafot etganini ma’lum qildi. Sobirjon Ruziyev 2026-yil 22-avgust kuni 74 yoshida hayotdan ko‘z yumdi.
U 1953-yil 15-iyunda tavallud topgan. Sport faoliyati davomida SSSR terma jamoasi safida rapira bo‘yicha ishtirok etib, xalqaro maydonlarda yuqori natijalarga erishgan. Ruziyev 1980-yilda Moskvada bo‘lib o‘tgan Olimpiya o‘yinlarida jamoaviy bahslarda kumush medalni qo‘lga kiritgan. Shuningdek, shaxsiy bahslarda to‘rtinchi o‘rinni egallagan.
Sobirjon Ruziyev uch karra jahon chempioni bo‘lish bilan birga, jahon chempionatlarida kumush va bronza medallariga ham sazovor bo‘lgan. U umumittifoq va xalqaro musobaqalarda ko‘plab g‘alabalarni qo‘lga kiritgan.
Sportchilik faoliyatini yakunlagach, u umrini O‘zbekistonda jismoniy tarbiya, Olimpiya harakati va qilichbozlik sportini rivojlantirishga bag‘ishlagan. Turli yillarda O‘zbekiston Respublikasi Jismoniy tarbiya va sport davlat qo‘mitasi, O‘zbekiston Milliy Olimpiya qo‘mitasi hamda O‘zbekiston qilichbozlik federatsiyasiga rahbarlik qildi. Shuningdek, Osiyo qilichbozlik konfederatsiyasining rahbar organlarida O‘zbekiston nomidan faoliyat yuritdi.
Sobirjon Ruziyevning sport va mamlakat rivojiga qo‘shgan xizmatlari «O‘zbekiston Respublikasida xizmat ko‘rsatgan sportchi» faxriy unvoni, O‘zbekiston Respublikasining Faxriy yorlig‘i, Xalqaro Olimpiya qo‘mitasining Kumush Olimpiya ordeni va boshqa yuksak mukofotlar bilan e’tirof etilgan.
