Chorvoq suv omborida cho‘kib ketgan ota va uning ikki o‘g‘lidan birining jasadi topildi
Chorvoq suv omborida cho‘kib ketgan ota va uning ikki o‘g‘lidan biri – o‘g‘linming jasadi qariyb bir haftalik qidiruvlardan so‘ng topildi. Qolgan ikki kishini izlash ishlari davom etmoqda. Bu haqda FVV Portal24.uz’ga ma’lum qildi.
Favqulodda vaziyatlar vazirligi ma’lumotiga ko‘ra, 9-sentyabr kuni soat 13:02 da qutqaruvchilar cho‘kib ketgan uch nafar fuqarodan birining jasadiga ulashgan.
Hodisa 2-sentyabr kuni Toshkent viloyatining Bo‘stonliq tumanidagi Chorvoq suv omborida yuz bergan.
“Oila katerda sayr qilishga chiqqan. Suv boʻylab rasmga tushish maqsadida choʻmilish taqiqlangan joyda toʻxtashgan. Keyin ular shu oʻrtada choʻmilishni xohlashgan”, deydi Bo‘riyev.
Suvga avval o‘g‘illardan biri, keyin qutqaraman deb ota tushgan, ortidan yana bitta oʻgʻli tushgan. Va oʻsha ketma-ketlikda shu ayanchli vaziyat yuzaga kelgan.
Ona va qiz atrofdan yordam soʻrashgan. Katerni boshqarayotgan haydovchisi ham suvga tushib, ularni qutqarishga harakat qilgan, lekin imkoni boʻlmagan. Bu juda tez sodir boʻlgan.
Choʻmilish jarayonida qutqaruv jiletlaridan foydalanishmagan. Oqibatda oilaning dadasi hamda ikkita oʻgʻlining choʻmilayotganda tomiri tortishib qolgan. Shuningdek, o‘sha mahal shamol ham boʻlib turgan, suvda ozgina toʻlqin hosil boʻlgan — oʻsha jarayonda choʻkish holati yuz bergan”, deydi Boʻriyev.
Hozirda qidiruv-qutqaruv ishlariga beshta qutqaruv otryadi va suvdagi yettita brigada jalb qilingan. Shuningdek, vazir topshirig‘iga ko‘ra, Sirdaryo va Jizzax viloyatlaridan qo‘shimcha qutqaruvchilar yetib kelgan. Voqea joyida maxsus shtab tuzilib, tegishli vazirlik va hamkor xizmatlar bilan birgalikda qidiruv ishlari olib borilmoqda.
Hozirda qolgan ikki fuqaroni topish bo‘yicha qidiruv ishlari maxsus texnika va zamonaviy asbob-uskunalar yordamida davom ettirilmoqda.
