YPX mashinasini urib qochmoqchi bo‘lgan Nexia haydovchisi ushlandi
Chiroqchi tumanida tungi xizmatni o‘tayotgan YPX inspektorlari hujjatlarni tekshirish uchun Nexia-2 rusumli avtomobilni to‘xtatishga uringan. Biroq haydovchi qonuniy talabga bo‘ysunmasdan, voqea joyidan yashirinishga harakat qilgan. Keyingi chorrahadagi inspektorlarning takroriy ishoralariga ham e’tibor qirmagan holda harakatlanishda davom etgan.
Ichki ishlar xodimlari qoidabuzarni to‘xtatish uchun patrul mashinasi yordamida uning yo‘lini qarama-qarshi yo‘nalishda to‘sgan. Shunga qaramay, haydovchi xizmat avtomobiliga borib urilgan va yana qochishga uringan. Ko‘rilgan tezkor chora-tadbirlar natijasida transport vositasi to‘xtatilib, uning shaxsi aniqlangan.
Ushlangan haydovchi o‘z qilmishini haydovchilik hujjati yo‘qligi va jazolanishdan qo‘rqqani bilan izohlagan hamda qilmishidan afsusda ekanini bildirgan. Hozirda mazkur voqea yuzasidan surishtiruv ishlari davom ettirilmoqda.
