Xorijda qaramog‘siz qolgan 11 nafar o‘zbekistonlik bola vatanga qaytarildi
Olib kelingan bolalarning 9 nafari Rossiya Federatsiyasidan, 2 nafari esa Qozog‘iston Respublikasidan evakuatsiya qilingan. Ushbu insonparvarlik operatsiyasi Ichki ishlar vazirligi, Sog‘liqni saqlash vazirligi hamda Prezident huzuridagi Ijtimoiy himoya milliy agentligi vakillaridan iborat maxsus ishchi guruh tomonidan tashkillashtirildi. Jarayonda Bolalar ombudsmani va xorijiy davlatlarning tegishli tashkilotlari ham faol ishtirok etdi.
Hozirda O‘zbekistonga olib kelingan bolalarni o‘z oilalari bag‘riga qaytarish va ularning huquq hamda manfaatlarini to‘liq ta’minlash bo‘yicha zarur choralar ko‘rilmoqda. Shuningdek, ularni har tomonlama qo‘llab-quvvatlash va ijtimoiy xizmatlar bilan qamrab olish yo‘lga qo‘yilgan.
Bolalarning keyingi hayoti, ruhiy holati hamda oilaviy muhitga moslashuvi doimiy nazoratda bo‘ladi. Bu jarayon yashash manzillari bo‘yicha “Inson” ijtimoiy xizmatlar markazlari xodimlari tomonidan ijtimoiy hamrohlik asosida muntazam kuzatib boriladi.
Avvalroq Novosibirskda onasidan tortib olingan ikki oylik o‘zbekistonlik chaqaloq Toshkentga qaytarilgani xabar qilingan edi.
