Xitoyliklar Farg‘onada 170 million dollarlik elektrobus va elektr yuk mashinalari zavodini quryapti
Farg‘ona viloyatining Yozyovon tumanidagi “Ijodkor” mahallasida joylashgan maxsus sanoat zonasida yirik avtomobilsozlik loyihasini amalga oshirishga kirishildi. Xitoyning Xiang Yang Tenglong Automobile hamda GIG Investments kompaniyalari bilan hamkorlikda barpo etilayotgan ushbu majmualar uchun 10 gektar maydon ajratilgan. Umumiy maydon va quvvatiga ko‘ra 170 million dollar sarflanadigan zavodda yiliga 700 dona elektrobus ishlab chiqarish rejalashtirilgan bo‘lib, uni rasman 2027-yilning dekabr oyida ishga tushirish ko‘zda tutilgan.
Sanoat loyihasining birinchi bosqichida asosan jamoat transporti uchun mo‘ljallangan elektrobuslar konveyerdan chiqsa, keyingi bosqichlarda elektr energiyasida ishlaydigan yuk avtomobillarini tayyorlash yo‘lga qo‘yiladi. Ishlab chiqarilgan mahsulotlar nafaqat O‘zbekiston ichki bozoriga yetkazib beriladi, balki xorijiy mamlakatlarga ham eksport qilinadi. Viloyat hokimligi ma’lumotlariga ko‘ra, loyiha hudud sanoat salohiyatini keskin oshirish va hududda ko‘plab yangi ish o‘rinlarini yaratishga xizmat qiladi.
Majmua qurilishiga start berishga bag‘ishlangan tantanali marosimda viloyat hokimi Xayrulla Bozorov, xitoylik investorlar, jamoatchilik va nuroniylar vakillari qatnashgan.
Loyiha bo‘yicha dastlabki muzokaralar joriy yilning mart oyida o‘tkazilgan bo‘lib, unda qutqaruv hamda maishiy chiqindi tashishga mo‘ljallangan maxsus texnikalarni mahalliylashtirish va ishlab chiqarish masalalari ham kelishib olingan.
