Xitoy-Qirg‘iziston-O‘zbekiston temiryo‘lida eng baland ko‘prik qurilyapti
Suzoq tumanidagi Kech-Olot daryosi ustidan o‘tuvchi mazkur ko‘prik xalqaro temiryo‘l yo‘nalishidagi eng yirik va murakkab muhandislik inshootlaridan biriga aylanadi. Temiryo‘l o‘tkazgichining umumiy uzunligi 956 metrdan oshib, uning eng baland ustunli tayanchi 96 metrni, umumiy balandlik ko‘rsatkichi esa 122 metrni tashkil etadi.
Hozirgi kunda loyiha doirasida qurilish jarayonlari jadal sur’atlarda olib borilmoqda. Qutqaruv va muhandislik xizmatlari tomonidan ko‘prikning mustahkam poydevorini quyish ishlari to‘liq yakuniga yetkazildi. Shuningdek, asosiy tayanch va ustunlarni tiklash ishlari 54 foizga bajarilgani ma’lum qilindi.
Ushbu temiryo‘l ko‘prigi to‘liq foydalanishga topshirilgach, uch mamlakatni bog‘lovchi strategik magistral bo‘ylab yuk va yo‘lovchi tashish xavfsizligi hamda samaradorligini ta’minlashda asosiy bo‘g‘in vazifasini o‘taydi. Logistika loyihasi doirasidagi qurilish ishlari doimiy nazorat ostida davom ettirilmoqda.
