Vafot etgan ayolning yoshi bilan bog‘liq salomatlik muammolari bo‘lgan – Chirchiq hokimligi

Hokimlik ma'lum qildiki, olib borilgan o'rganishlar voqea ijtimoiy tarmoqlarda tarqatilayotgan ayrim ma'lumotlarda keltirilganidek bir tomonlama emasligini ko'rsatgan.

Keksa yoshli fuqaro bir necha yil davomida ko'p qavatli uy hovlisi va kirish yo'laklarida daydi it hamda mushuklarni muntazam ovqatlantirib kelgan. Natijada hududning sanitariya holati yomonlashgani va bu ko'p qavatli uyda yashovchi fuqarolarning e'tirozlariga sabab bo'lgani aytilgan.

Rasmiy ma'lumotga ko'ra, mahalla fuqarolar yig'ini hamda hududiy profilaktika inspektori tomonidan fuqaro bilan bir necha bor profilaktik suhbatlar o'tkazilgan, amaldagi qonunchilik talablari tushuntirilgan va rasman ogohlantirilgan. Biroq, ogohlantirishlarga qaramay, mazkur harakatlar davom ettirilgani ta'kidlangan.

Shundan so'ng ushbu xonadonda yashovchi fuqarolar jamoaviy ravishda mahalla raisiga murojaat qilib, holatni tasdiqlovchi videoyozuvlarni taqdim etgan hamda qonuniy chora ko'rishni so'ragan.

Hokimlikka ko’ra, mazkur murojaatlar asosida Chirchiq shahar IIB Huquqbuzarliklar profilaktikasi bo’limi profilaktika inspektori tomonidan 2026-yil 26-iyun kuni O'zbekiston Respublikasi Ma'muriy javobgarlik to'g'risidagi kodeksining 110-moddasi (“Hayvonlarni saqlash qoidalarini buzish”)ga muvofiq ma'muriy bayonnoma rasmiylashtirilgan.

Rasmiy munosabatda aytiladiki, 2026-yil 22-iyul kuni volontyorlar keksa yoshli fuqaroning holidan xabar olish maqsadida uning xonadoniga borgan. Eshik ochilmagani sababli bu haqda mahalla raisiga xabar berilgan va Favqulodda vaziyatlar xizmati jalb qilingan. Xonadon eshigi ochilgach, fuqaroning vafot etgani aniqlangan.

Shuningdek, surishtiruv davomida fuqaroning yoshi bilan bog'liq salomatlik muammolari mavjud bo'lgani hamda uzoq vaqt davomida davolanib kelgani ma'lum bo'lgani qayd etilgan.

Shu munosabat bilan Chirchiq shahar hokimligi jamoatchilikni ijtimoiy tarmoqlarda tarqatilayotgan tasdiqlanmagan yoki bir tomonlama talqin qilingan ma'lumotlarga emas, balki rasmiy manbalar taqdim etayotgan ishonchli axborotlarga tayanishga chaqirdi.

Eslatib o'tamiz, avvalroq Portal24 Instagram sahifasida Chirchiq shahrida yashovchi pensioner ayolning daydi mushuklarni ovqatlantirgani uchun ma'muriy javobgarlikka tortilgani, keyinchalik esa uning vafot etgani haqida "Mehr va Oqibat" hayvonlarni himoya qilish jamiyati ma'lumotiga asoslanib xabar berilgan edi. Mazkur holat ijtimoiy tarmoqlarda keng muhokamalarga sabab bo'lgach, Chirchiq shahar hokimligi rasmiy munosabat bilan chiqdi.