Ufada 12 ta mashina ishtirokidagi halokatli YTHni sodir etgan O‘zbekiston fuqarosi 9 yilga qamaldi
Boshqirdiston prokuraturasi xabariga ko‘ra, fojiali voqea 2025-yilning oktyabr oyida sodir bo‘lgan. O‘zbekistonlik haydovchi tegishli haydovchilik guvohnomasiga ega bo‘lmagan holda “Shacman” rusumli og‘ir yuk mashinasini boshqarib kelgan. To‘qnashuv oqibatida uch kishi voqea joyida halok bo‘lgan, yana bir fuqaro esa og‘ir tan jarohatlari olgan.
Olib borilgan tergov harakatlari davomida yuk avtomobilining tormoz tizimi nosoz ekani, haydovchi yo‘lga chiqishdan oldin uni tekshirmagani hamda me’yoridan ortiq yuk ortgani ma’lum bo‘ldi. Bundan tashqari, u transport vositasining texnik holatini inobatga olmasdan tezlikni oshirgan, natijada Ufa shossesi va Chudskaya ko‘chalari chorrahasida boshqaruvni yo‘qotib, bir yo‘nalishda turgan 12 ta avtomobilni urib yuborgan.
Sud ayblanuvchini ikki va undan ortiq kishining o‘limiga olib kelgan yo‘l harakati qoidalarini buzishda aybli deb topdi. Hukmga ko‘ra, u 9 yil muddatga ozodlikdan mahrum qilindi hamda jazoni o‘tab bo‘lganidan so‘ng ham 3 yil davomida transport vositalarini boshqarish huquqidan mahrum etildi.
