Turkiyada uch farzandi bilan ko‘chada qolgan o‘zbekistonlik ayol vatanga qaytarildi
O‘zbekistonning Istanbuldagi Bosh konsulxonasi xabariga ko‘ra, fuqaro moddiy va maishiy qiyinchiliklar tufayli bolalari bilan og‘ir ahvolga tushib qolganidan so‘ng diplomatik vakolatxonaga amaliy yordam so‘rab murojaat qilgan.
Murojaatdan so‘ng Bosh konsulxona hamda Migratsiya agentligi vakillari hamkorlikda tezkor chora-tadbirlarni amalga oshirdi. Dastlabki bosqichda oila zarur oziq-ovqat mahsulotlari bilan ta’minlandi hamda ularning mamlakatdan chiqib ketishi uchun talab etiladigan rasmiy hujjatlar rasmiylashtirildi.
Shuningdek, mas’ul idoralar ko‘magida oilaning O‘zbekistonga qaytishi uchun aviachiptalar xarid qilinib, ular 17-sentyabr kuni Toshkentga kuzatib qo‘yildi. Bosh konsulxona xorijiy mamlakatlarda qiyin vaziyatga tushib qolgan fuqarolarga qonuniy va amaliy yordam berish ko‘rsatkichlari izchil davom etishini qayd etdi.
