Turkiyada salqinlanish uchun daryoga tushgan o‘zbekistonlik 21 yoshli yigit cho‘kib ketdi
Turkiyaning Mug‘la viloyati Saydikamar tumanidagi Eshen daryosiga salqinlashish uchun tushgan O‘zbekiston fuqarosi 21 yoshli Shoyadbek Halimjonov cho‘kib, hayotdan ko‘z yumdi.
Hodisa joriy yilning 1- iyul kuni soat 15:00 atrofida Cho‘ponlar mahallasida sodir bo‘lgan. Shoyadbek daryoga tushganidan so‘ng uyiga qaytmagan. Uning oila a’zolari daryo bo‘yiga kelib, qirg‘oqdan kiyimlari va mobil telefonini topgach, Favqulodda chaqiruv markaziga xabar bergan.
Voqea joyiga politsiya, tibbiyot xodimlari hamda qidiruv-qutqaruv guruhlari yuborilgan. G‘avvoslar tomonidan olib borilgan qidiruv ishlari natijasida Shoyadbekning jasadi topilgan. Prokuror hodisa joyida tekshiruv o‘tkazganidan so‘ng marhumning jasadi sud-tibbiyot morgiga olib ketilgan.
Mahalla oqsoqoli Bayram Oqg‘uch qidiruv ishlaridan so‘ng jonsiz badani topilganini aytgan:
“U salqinlashish uchun daryoga tushgan ekan. Oilasi uyga qaytmagach, qidirib kelib, kiyimlari va telefonini topgan. Shundan so‘ng mutasaddi xizmatlarga xabar berildi. Qidiruv ishlari olib borildi, afsuski, uning jonsiz tanasi topildi. Alloh rahmat qilsin”, degan mahalla oqsoqoli.
