Turkiyada o‘zbekistonliklar shubhali pul o‘tkazmalari sabab qamoq va deportatsiyaga tushdi
O‘zbekistonning Istanbuldagi Bosh konsulxonasi ijtimoiy tarmoqlarda tarqalgan “30 dan ortiq fuqaro ushlandi” degan xabarlarga aniqlik kiritib, vaziyat nazoratda ekanini ma’lum qildi.
Turkiya IIV ma’lumotlariga ko‘ra, gumonlanuvchilarning bir qismi sud hukmi bilan qamoqxonaga joylashtirilgan, ayrimlari deportatsiya markazida saqlanmoqda. Boshqa bir guruhi esa mamlakatdan chiqib ketmaslik tilxati bilan ozodlikda qolib, tergov jarayonida qatnashmoqda. Fuqarolarga nisbatan qo‘llanilayotgan huquqiy choralar ularning moliyaviy sxemalarga qanchalik aloqadorligi va kartalari orqali aylantirilgan pul miqdoriga qarab belgilanmoqda.
Diplomatik vakolatxona ushbu holat yuzasidan turk huquqni muhofaza qiluvchi idoralari bilan hamkorlikda ish olib borayotganini va fuqarolarga zarur konsullik-huquqiy yordam ko‘rsatilayotganini bildirdi. Shu bilan birga, konsulxona Turkiyada bo‘lib turgan hamyurtlarni ogohlantirib, shaxsiy bank kartalari va mobil ilovalarni begona shaxslarga bermaslikka chaqirgan.
Turkiya qonunchiligiga ko‘ra, bank hisobraqamlarini boshqa shaxslarga foydalanish uchun topshirish yoki kelib chiqishi noma’lum pullarni o‘tkazishda vositachilik qilish jiddiy jinoiy javobgarlikka sabab bo‘ladi. Konsulxona fuqarolarni ogoh bo‘lishga hamda shubhali moliyaviy operatsiyalardan uzoq yurishga takroran da’vat etmoqda.
