Toshkentning beshta tumanida issiq suvdan kelayotgan kimyoviy hid sabab favqulodda tekshiruvlar boshlandi
Mazkur holat yuzasidan “Veolia Energy Tashkent” kompaniyasi rasmiy munosabat bildirdi.
Kompaniya ma’lumotlariga ko‘ra, ko‘rsatilgan tumanlarga tarmoq suvi tashqi yetkazib beruvchi – “Toshkent Issiqlik Elektr Markazi” AJ tomonidan uzatiladi. Murojaatlar ortidan “Veolia Energy Tashkent”ning maxsus laboratoriya mutaxassislari joylarga chiqib, suv manbalari hamda murojaat qilgan xonadonlardan suv namunalarini olishgan.
Hozirda olingan namunalar kimyoviy-bakteriologik va organoleptik ko‘rsatkichlar bo‘yicha tahlil qilinmoqda. Tadqiqotlar yakunlangach, tahlil natijalari keng jamoatchilikka e’lon qilinishi rejalashtirilgan.
Buning parallel ravishda, suv sifati bilan bog‘liq ma’lumotlar manba – “Toshkent Issiqlik Elektr Markazi” AJga yetkazildi. Kompaniya resurs yetkazib beruvchidan texnologik jarayonni zudlik bilan me’yorlashtirish va magistral tarmoqlarni yuvish bo‘yicha shoshilinch choralar ko‘rishni so‘ragan. Vaziyat nazoratga olingan bo‘lib, suv ta’minotini me’yorga keltirish ishlari olib borilmoqda.
